భారత్-కివీస్ సిరీస్‌లో కొత్త టెక్నాలజీ.. డీఆర్‌ఎస్‌లో తొలిసారిగా 'సోనిక్'

క్రికెట్‌లో అంపైర్ల నిర్ణయాల కచ్చితత్వాన్ని పెంచే దిశగా మరో ముందడుగు పడింది. భారత్, న్యూజిలాండ్ మధ్య గురువారం నుంచి ప్రారంభం కానున్న సిరీస్‌లో అంపైర్ నిర్ణయ సమీక్ష వ్యవస్థ (డీఆర్‌ఎస్)లో తొలిసారిగా 'సోనిక్' టెక్నాలజీని ఉపయోగించనున్నట్లు న్యూజిలాండ్ క్రికెట్ అధికారికంగా ప్రకటించింది. ఈ కొత్త టెక్నాలజీతో డీఆర్‌ఎస్ మరింత పటిష్ఠం కానుంది.

న్యూజిలాండ్‌కు చెందిన వర్చువల్ ఐ సంస్థ ఈ 'సోనిక్' టెక్నాలజీని రూపొందించింది. ఇది ఒక అత్యాధునిక ఆడియో అనాలిసిస్ టెక్నాలజీ. బ్యాట్‌కు బంతి తగిలిందా లేదా (ఎడ్జ్) అనే విషయాన్ని ధ్వని ఆధారంగా విశ్లేషించి థర్డ్ అంపైర్‌కు స్పష్టమైన సమాచారం అందిస్తుంది. 

దీనివల్ల అత్యంత వివాదాస్పదమైన క్యాచ్‌ల విషయంలోనూ కచ్చితమైన నిర్ణయాలు తీసుకోవడం సులభతరం అవుతుంది. ఇప్పటికే బాల్-ట్రాకింగ్ టెక్నాలజీతో ఐసీసీ గుర్తింపు పొందిన వర్చువల్ ఐ సంస్థ, ఇప్పుడు ఈ ఎడ్జ్-డిటెక్షన్ టెక్నాలజీతో పూర్తిస్థాయి డీఆర్‌ఎస్ సేవలను అందించనుంది.

ఈ టెక్నాలజీకి ఆమోదం లభించే ముందు విస్తృత స్థాయిలో పరీక్షలు నిర్వహించారు. అంతర్జాతీయ క్రికెట్ కౌన్సిల్ (ఐసీసీ)తో సంప్రదింపులు జరిపి, స్వతంత్ర సంస్థలతో దీని పనితీరును అంచనా వేయించారు. ఈ ప్రక్రియకు బీసీసీఐ కూడా పూర్తి మద్దతు తెలిపిందని న్యూజిలాండ్ క్రికెట్ వెల్లడించింది. భవిష్యత్తులో ఈ టెక్నాలజీని ఇతర సిరీస్‌లలో వాడాలంటే ఐసీసీ అక్రిడిటేషన్, అనుమతులు తప్పనిసరి.

ఈ సందర్భంగా న్యూజిలాండ్ క్రికెట్ చీఫ్ మార్కెటింగ్ ఆఫీసర్ గ్లెన్ క్రిచ్లీ మాట్లాడుతూ.. "ఆటలో నిర్ణయాల సమగ్రత చాలా ముఖ్యం. అందుకే ఈ టెక్నాలజీని సమగ్రంగా పరీక్షించాం. ఈ ప్రక్రియ ఫలితం పట్ల సంతోషంగా ఉన్నాం. సహకరించిన ఐసీసీ, బీసీసీఐ, స్కై, వర్చువల్ ఐ సంస్థలకు ధన్యవాదాలు" అని తెలిపారు. 

వర్చువల్ ఐ సీఈఓ బెన్ టేలర్ మాట్లాడుతూ.. "అంతర్జాతీయ క్రీడల్లో అత్యున్నత ప్రమాణాలకు అనుగుణంగా, కచ్చితత్వానికి ప్రాధాన్యత ఇస్తూ మా బృందం ఈ టెక్నాలజీని అభివృద్ధి చేసింది" అని వివరించారు.

భారత జట్టు న్యూజిలాండ్ పర్యటనలో ఐదు టీ20లు, ఐదు వన్డేలు, రెండు టెస్టు మ్యాచ్‌లు ఆడనుంది. ఇవాళ్టి నుంచి తొలి టీ20తో ప్రారంభ‌మ‌య్యే ఈ సుదీర్ఘ పర్యటన డిసెంబర్ 1న రెండో టెస్టుతో ముగియనుంది.